مراد علي ڪاظم شيخ : سنڌ جو غزل گو شاعر شيخ مراد علي ‘ڪاظم’، 10 مئي 1901ع تي روهڙيءَ ضلعي سکر ۾ ڄائو. هن ابتدائي تعليم روهڙي ۽ خيرپور ميرس مان ورتي، ان کان پوءِ 1919ع ۾ سنڌ مدرسة الاسلام مان مئٽرڪ پاس ڪيائين. ساڳئي سال نوڪري مليس، پر طبيعت صحيح نه هجڻ سبب نوڪري نه ڪيائين. ان عرصي ۾ هن عربي ۽ فارسيءَ جي تعليم پڻ چڱن استادن کان حاصل ڪئي، ان کانسواءِ هن اردو ٻوليءَ ۾ پڻ مهارت حاصل ڪئي. هي زندگيءَ جي ابتدائي دور ۾ لاڙڪاڻي ۽ حيدرآباد جي ادبي حلقن سان وابسته رهيو، انهيءَ دور ۾ هن مفتي سعيدالله وٽان فارسيءَ جي ڪتاب ‘ديوان حافظ’ جو پڻ درس حاصل ڪري ورتو. هن 1923ع کان شاعري ڪرڻ شروع ڪئي ۽ هڪ ديوان مرتب ڪيو. سندس ڪلام سنڌيءَ جي معياري، علمي ۽ ادبي رسالن توڙي اخبارن ۾ ڇپيو هو. هن جو ڪلام رنگين، پختو ۽ برجستو آهي. هن سنڌي ٻوليءَ سان گڏ فارسي ٻوليءَ ۾ به شاعري تي طبع آزمائي ڪئي آهي. سندس فارسي ڪلام ٻڌي هندستان جي شاعره ۽ اديبه سروجني نائيڊو پڻ داد ڏنو هو، جنهن جي هدايت موجب ئي هن ڌارين ٻولين ۾ طبع آزمائيءَ کي ڇڏي پنهنجي مادري سنڌي ٻوليءَ ۾ شعر چوڻ کي ترجيح ڏني. شيخ مراد عليءَ پنهنجي حياتيءَ جو ڳچ حصو ملازمت سانگي ڪراچيءَ ۾ گذاريو ۽ اتي ملازمت سان گڏوگڏ ادبي خدمتون پڻ سرانجام ڏيندو رهيو. سنڌ جي هن نامياري شاعر، آڪٽوبر 1954ع ۾ وفات ڪئي
1901.05.10 عيسوي
سنڌ جو غزل گو شاعر شيخ مراد علي ‘ڪاظم’، 10 مئي 1901ع تي روهڙيءَ ضلعي سکر ۾ ڄائو.